கேள்விகள்

மேம்பட்ட நீண்டகால சிறுநீரக நோய் என்பது, சிறுநீரகங்களின் செயல்பாடு நீண்டகாலமாக கணிசமாகக் குறைந்திருக்கும் நிலையாகும். இதனால் உடலில் உள்ள கழிவுகள் மற்றும் அதிகப்படியான நீரை வெளியேற்றுதல், இரத்த அழுத்தத்தைக் கட்டுப்படுத்துதல், இரத்த சிவப்பணுக்கள் உருவாக உதவுதல், அமில சமநிலையையும் எலும்பு நலத்தையும் பேணுதல் போன்ற சிறுநீரகங்களின் பணிகள் பாதிக்கப்படலாம்.

eGFR என்பது உங்கள் சிறுநீரகங்கள் இரத்தத்தை எவ்வளவு நன்றாக வடிகட்டுகின்றன என்பதை மதிப்பிடும் ஒரு கணக்கு. இரத்தத்தில் உள்ள கிரியேட்டினின் அளவு, வயது மற்றும் பாலினத்தைப் பயன்படுத்தி இது கணக்கிடப்படுகிறது. ஒரே ஒரு eGFR முடிவை விட, காலப்போக்கில் அது எவ்வாறு மாறுகிறது என்பதைப் பார்ப்பதே முக்கியம். eGFR உடன் மற்ற இரத்த மற்றும் சிறுநீர் பரிசோதனை முடிவுகளையும் சேர்த்தே உங்கள் சிறுநீரக நிலையை சிறுநீரக பராமரிப்புக் குழு மதிப்பிடும்.

அவசியமில்லை. eGFR எண்ணை மட்டும் வைத்து டயாலிசிஸ் தொடங்க வேண்டுமா என்பதைத் தீர்மானிக்க முடியாது. உங்கள் அறிகுறிகள், இரத்தப் பரிசோதனை முடிவுகள், உடல்நிலை மற்றும் சிறுநீரக செயல்பாடு காலப்போக்கில் எவ்வாறு மாறுகிறது என்பவற்றை ஒன்றாகப் பார்த்தே டயாலிசிஸ் எப்போது தேவை என்பதை சிறுநீரக பராமரிப்புக் குழு தீர்மானிக்கும்.

சிறுநீரக நோய் மோசமடையும் வேகம் ஒவ்வொருவருக்கும் வேறுபடும். நோய்க்கான காரணம், காலப்போக்கில் eGFR எவ்வாறு மாறுகிறது, சிறுநீரில் புரதத்தின் அளவு மற்றும் பிற உடல்நலப் பிரச்சினைகள் போன்றவற்றை வைத்து உங்கள் சிறுநீரக நிலை எவ்வாறு மாறலாம் என்பதை சிறுநீரக பராமரிப்புக் குழு மதிப்பிடும்.

சிலருக்கு, சிறுநீரக செயல்பாடு குறைவதற்கான காரணத்தை கண்டறிந்து சிகிச்சையளித்தால் சிறுநீரக செயல்பாடு ஓரளவு மேம்படலாம். சிலருக்கு அது நீண்டகாலம் அதிக மாற்றமின்றி நிலையாக இருக்கலாம். ஒரே ஒரு பரிசோதனை முடிவை விட, காலப்போக்கில் சிறுநீரக செயல்பாடு எவ்வாறு மாறுகிறது என்பதைப் பார்ப்பதே முக்கியம்.

மருத்துவர் பரிந்துரைத்த மருந்துகளை முறையாக எடுத்துக்கொள்ளுங்கள். தேவையானால் இரத்த அழுத்தத்தையும் நீரிழிவையும் நன்றாகக் கட்டுப்படுத்துங்கள். உங்கள் உடல்நிலைக்கு ஏற்ற அளவில் உடற்பயிற்சி அல்லது உடல் இயக்கத்தைத் தொடர்ந்து செய்யுங்கள். புகைப்பிடிப்பதைத் தவிருங்கள். மருந்துச் சீட்டின்றி வாங்கும் மருந்துகள் அல்லது மூலிகைத் தயாரிப்புகளை எடுத்துக்கொள்ளும் முன் உங்கள் சிறுநீரக பராமரிப்புக் குழுவிடம் ஆலோசனை பெறுங்கள்.

ஒவ்வொருவருக்கும் தேவையான கண்காணிப்பு அவரவர் உடல்நிலைக்கேற்ப திட்டமிடப்படும். பொதுவாக அறிகுறிகள், இரத்த அழுத்தம், எடை மற்றும் உடல் திரவநிலை, eGFR, பொட்டாசியம், பைகார்பனேட், ஹீமோகுளோபின், சிறுநீரில் புரதம், ஊட்டச்சத்து மற்றும் எலும்பு-கனிம ஆரோக்கியக் குறியீடுகள் சேரும்.

உடலில் அதிகப்படியான நீர் தேங்குதல் அல்லது இரத்த அழுத்தத்தைக் கட்டுப்படுத்த முடியாமை, இரத்தப் பரிசோதனைகளில் தொடர்ந்து ஏற்படும் முக்கிய மாற்றங்கள், பசியின்மை அல்லது ஊட்டச்சத்து குறைவு, அன்றாட வாழ்க்கையைப் பாதிக்கும் அறிகுறிகள் போன்ற சிறுநீரகச் செயல்பாடு குறைவதால் ஏற்படும் பிரச்சினைகளை சிறுநீரக பராமரிப்புக் குழு கவனிக்கும். இவை அனைத்தையும் உங்கள் ஒட்டுமொத்த உடல்நிலையுடன் சேர்த்துப் பார்த்தே அடுத்த கட்ட சிகிச்சை குறித்து முடிவு செய்யப்படும்.

சிறுநீரக மாற்று அறுவைச் சிகிச்சைக்கான மதிப்பீட்டிற்கும், டயாலிசிஸிற்குத் தேவையான ஏற்பாடுகளுக்கும் நேரம் தேவைப்படலாம். முன்கூட்டியே திட்டமிடுவதன் மூலம் உங்கள் கேள்விகளுக்குப் பதில் பெறவும், அவசரமாக முடிவெடுப்பதைத் தவிர்க்கவும், தேவைப்படும் நேரத்தில் பொருத்தமான சிகிச்சையைத் தொடங்கத் தயாராக இருக்கவும் முடியும்.

முக்கிய வழிகள் சிறுநீரக மாற்று அறுவைச் சிகிச்சை, வயிற்றுப்படல டயாலிசிஸ், இரத்த டயாலிசிஸ் மற்றும் டயாலிசிஸ் இல்லாத சிறுநீரக பராமரிப்பு. பொருத்தம் உங்கள் உடல்நிலை, சூழ்நிலை, கிடைக்கும் சேவைகள் மற்றும் மருத்துவ மதிப்பீட்டைப் பொறுத்தது.

பொருத்தமான சில நோயாளிகள் டயாலிசிஸுக்கு முன் மாற்று அறுவைச் சிகிச்சை பெறலாம். மதிப்பீடும் தானமளிப்பவர் திட்டமிடலும் நேரம் எடுப்பதால் இந்த வாய்ப்பை சிறுநீரக மற்றும் மாற்று அறுவைச் சிகிச்சைக் குழுக்களுடன் முன்கூட்டியே பேச வேண்டும்.

வயிற்றுப்படல டயாலிசிஸ் வயிற்றின் உட்புறப் படலத்தை வடிகட்டியாகப் பயன்படுத்துகிறது; வயிற்றில் மென்மையான குழாய் வைக்கப்பட வேண்டும். இரத்த டயாலிசிஸ் நிலையத்தில் ஒரு இயந்திரம் மூலம் இரத்தத்தை வடிகட்டுகிறது.

இது டயாலிசிஸ் அல்லது மாற்று அறுவைச் சிகிச்சை இல்லாமல், அறிகுறிகளைக் கட்டுப்படுத்தி உடல்நலத்தையும் வாழ்க்கைத் தரத்தையும் பேணுவதற்காகத் திட்டமிடப்படும் தொடர்ச்சியான பராமரிப்பு. அறிகுறிக் கட்டுப்பாடு, வாழ்க்கைத் தரம், சிறுநீரகச் சிக்கல்களின் மருத்துவ மேலாண்மை மற்றும் நோயாளிக்கும் குடும்பத்திற்கும் ஆதரவு ஆகியவற்றில் கவனம் செலுத்துகிறது.

உங்கள் உடல்நிலை, சூழ்நிலை அல்லது விருப்பங்கள் மாறும்போது தெரிவுகளை மறுபரிசீலனை செய்யலாம். சில மாற்றங்களுக்கு மேலதிக மதிப்பீடு அல்லது தயாரிப்பு தேவைப்படலாம்; உடனடியாகச் செய்ய முடியாமல் இருக்கலாம். எனவே சிறுநீரக பராமரிப்புக் குழுவுடன் முன்கூட்டியே பேசுங்கள்.

அனைவருக்கும் ஒரே மாதிரியான உணவு அல்லது திரவக் கட்டுப்பாடுகள் தேவையில்லை. உப்பு, புரதம், பொட்டாசியம், பாஸ்பேட் மற்றும் நீங்கள் குடிக்கும் திரவத்தின் அளவு ஆகியவற்றில் மாற்றங்கள் தேவையா என்பது உங்கள் சிறுநீரகச் செயல்பாடு, இரத்தப் பரிசோதனை முடிவுகள், உடல்நிலை மற்றும் சிகிச்சைத் திட்டத்தைப் பொறுத்தது. உங்களுக்கு ஏற்ற உணவு மற்றும் திரவ அளவு குறித்து உங்கள் சிறுநீரக பராமரிப்புக் குழுவிடம் ஆலோசனை பெறுங்கள்.

பெரும்பாலானவர்கள் வேலை, படிப்பு மற்றும் பயணத்தைத் தொடர முடியும். உங்கள் உடல்நிலை மற்றும் சிகிச்சையைப் பொறுத்து சில மாற்றங்கள் தேவைப்படலாம். டயாலிசிஸ் அல்லது பிற சிகிச்சைகளுக்கான நேரத்தை கருத்தில் கொண்டு வேலை, படிப்பு மற்றும் பயணத்தை முன்கூட்டியே திட்டமிடுங்கள். நீண்ட பயணம் அல்லது வெளிநாட்டுப் பயணம் மேற்கொள்ளத் திட்டமிட்டால், தேவையான ஏற்பாடுகளை முன்கூட்டியே செய்ய உங்கள் சிறுநீரக பராமரிப்புக் குழுவிடம் ஆலோசனை பெறுங்கள்.

ஆம். மேம்பட்ட சிறுநீரக நோய் உள்ள சில பெண்கள் கர்ப்பமடைய முடியும். ஆனால் சிறுநீரக நோய் தீவிரமாக இருக்கும்போது கர்ப்பம் தரிப்பது தாய்க்கும் குழந்தைக்கும் அதிக ஆபத்துகளை ஏற்படுத்தலாம்.

கர்ப்பத்தைத் திட்டமிடுவதற்கு முன் உங்கள் சிறுநீரக பராமரிப்புக் குழுவுடன் பேசுவது மிகவும் முக்கியம். உங்கள் சிறுநீரக செயல்பாடு, இரத்த அழுத்தம், சிறுநீரில் உள்ள புரதத்தின் அளவு, நீங்கள் எடுத்துக்கொள்ளும் மருந்துகள் மற்றும் உங்கள் உடல்நிலையை அவர்கள் மதிப்பீடு செய்து, கர்ப்பத்துடன் தொடர்புடைய ஆபத்துகளை உங்களுடன் கலந்துரையாடுவார்கள்.

கர்ப்பம் உங்களுக்கு ஏற்றதா என்பதைப் பற்றிய முடிவை, இந்தத் தகவல்களின் அடிப்படையில் உங்கள் மருத்துவக் குழுவுடன் சேர்ந்து எடுக்கலாம்.

உங்கள் சிறுநீரக பராமரிப்புக் குழுவை விரைவாகத் தொடர்புகொண்டு, நீங்கள் கர்ப்பமாக இருப்பதைத் தெரிவியுங்கள். மேம்பட்ட சிறுநீரக நோயுடன் கூடிய கர்ப்பத்திற்கு நெருக்கமான மருத்துவக் கண்காணிப்பு தேவைப்படும்.

உங்கள் சிறுநீரக செயல்பாடு, இரத்த அழுத்தம், சிறுநீரில் உள்ள புரதத்தின் அளவு மற்றும் உங்கள் குழந்தையின் வளர்ச்சி தொடர்ந்து கண்காணிக்கப்படும். தேவைக்கேற்ப உங்கள் மருந்துகளிலும் சிகிச்சையிலும் மாற்றங்கள் செய்யப்படும்.

நீங்கள் எடுத்துக்கொள்ளும் அனைத்து மருந்துகள் குறித்தும் உங்கள் சிறுநீரக பராமரிப்புக் குழுவிடம் ஆலோசனை பெறுங்கள். மருத்துவரின் ஆலோசனை இல்லாமல் எந்த மருந்தையும் நிறுத்தவோ மாற்றவோ வேண்டாம்.

சிறுநீரக நோய் அல்லது உயர் இரத்த அழுத்தத்திற்குப் பயன்படுத்தப்படும் சில மருந்துகள் கர்ப்பகாலத்தில் பாதுகாப்பானவை அல்ல. சில மருந்துகளை கர்ப்பத்திற்கு முன்பே நிறுத்தவோ பாதுகாப்பான மாற்று மருந்துக்கு மாற்றவோ வேண்டியிருக்கலாம். மற்ற பல மருந்துகளை கர்ப்பகாலத்திலும் தொடர்ந்து எடுத்துக்கொள்ளலாம்.

நீங்கள் கர்ப்பம் தரிக்கத் திட்டமிட்டிருந்தாலோ அல்லது கர்ப்பமாக இருப்பதை அறிந்தாலோ, நீங்கள் எடுத்துக்கொள்ளும் அனைத்து மருந்துகள் குறித்தும் உங்கள் சிறுநீரக பராமரிப்புக் குழுவிடம் ஆலோசனை பெறுங்கள். மருத்துவரின் ஆலோசனை இல்லாமல் எந்த மருந்தையும் நிறுத்தவோ மாற்றவோ வேண்டாம்.

கர்ப்பகாலத்தில் டயாலிசிஸ் அவசியமானால், பொதுவாக இரத்த டயாலிசிஸே பயன்படுத்தப்படுகிறது. உங்களுக்கும் உங்கள் குழந்தைக்கும் சிறந்த பராமரிப்பை வழங்குவதற்காக, வழக்கத்தைவிட அதிகமான முறைகளிலும் நீண்ட நேரமும் டயாலிசிஸ் வழங்க வேண்டியிருக்கலாம்.

நீங்கள் கர்ப்பமடையும்போது ஏற்கனவே வயிற்றுப்படல டயாலிசிஸ் பெற்று வந்தால், இரத்த டயாலிசிஸுக்கு மாறுவது பற்றி உங்கள் சிறுநீரக பராமரிப்புக் குழு பொதுவாக உங்களுடன் கலந்துரையாடும்.

டயாலிசிஸ் எப்போது தொடங்கப்பட வேண்டும் என்பதைத் தீர்மானித்து, உங்கள் தனிப்பட்ட தேவைகளுக்கேற்ப சிகிச்சையைத் திட்டமிட உங்கள் சிறுநீரக மற்றும் மகப்பேற்று மருத்துவக் குழுக்கள் இணைந்து செயல்படும்.

சிறுநீரக நோயுள்ள பெரும்பாலானவர்களுக்குப் பாதுகாப்பான மற்றும் பயனுள்ள கருத்தடை முறைகள் உள்ளன. மிகவும் பொருத்தமான முறை உங்கள் சிறுநீரக நோய், இரத்த அழுத்தம், பிற உடல்நலப் பிரச்சினைகள், மருந்துகள் மற்றும் உங்கள் தனிப்பட்ட விருப்பங்களைப் பொறுத்தது.

கர்ப்பகாலத்தில் பாதுகாப்பானவையாக இல்லாமல் இருக்கக்கூடிய மருந்துகளை நீங்கள் பயன்படுத்தினால், நம்பகமான கருத்தடை முறையைப் பயன்படுத்துவது குறிப்பாக முக்கியம்.

உங்களுக்கு மிகவும் பாதுகாப்பான மற்றும் பொருத்தமான முறையைப் பற்றி குடும்பத் திட்டமிடல் சேவை அல்லது உங்கள் மருத்துவருடன் பேசுங்கள்.

சிறுநீரக பராமரிப்புக் குழு உங்கள் தற்போதைய உடல்நிலை மற்றும் சிறுநீரக செயல்பாட்டைப் பற்றி உங்களுடன் பேசும். அடுத்து என்னென்ன சிகிச்சை முறைகள் உள்ளன, அவற்றில் உங்களுக்கு எது பொருத்தமாக இருக்கலாம் என்பதையும் சிறுநீரக பராமரிப்புக் குழு விளக்கும்.

உங்களுக்கு முக்கியமான விடயங்கள், உங்கள் விருப்பங்கள் மற்றும் கவலைகளைப் பற்றிப் பேசவும், உங்களிடம் உள்ள கேள்விகளைக் கேட்கவும் இந்தச் சந்திப்பைப் பயன்படுத்திக்கொள்ளலாம்.

அடுத்த கட்ட பராமரிப்பைப் பற்றி நீங்களும் உங்கள் குடும்பத்தினரும் தெளிவாக அறிந்துகொள்ள, சிறுநீரக பராமரிப்புக் குழு உங்களுடன் கலந்துரையாடும்.

நீங்கள் விரும்பினால், உங்கள் குடும்ப உறுப்பினர் அல்லது உங்களுக்கு நெருக்கமான ஒருவரை ஆலோசனைச் சந்திப்புக்கு அழைத்து வரலாம்.

அவர்கள் உங்களுடன் சேர்ந்து மருத்துவர் கூறும் தகவல்களைக் கேட்கவும், முக்கியமான விடயங்களை நினைவில் வைத்துக்கொள்ளவும், உங்களிடம் உள்ள கேள்விகளைப் பற்றிப் பேசவும் உதவலாம்.

நீங்கள் தற்போது எடுத்துக்கொள்ளும் மருந்துகளின் பட்டியல் அல்லது மருந்துகளை எடுத்துவருங்கள்.

வேறு மருத்துவ நிலையங்களில் அண்மையில் செய்த இரத்தப் பரிசோதனைகள், ஸ்கேன் அல்லது பிற மருத்துவப் பரிசோதனைகளின் அறிக்கைகள் இருந்தால் அவற்றையும் எடுத்துவரலாம்.

மேலும், மருத்துவரிடம் கேட்க விரும்பும் கேள்விகளை முன்கூட்டியே எழுதி வைத்திருந்தால், அந்தப் பட்டியலையும் எடுத்துவருவது உதவியாக இருக்கும்.

சிறுநீரக மாற்று அறுவைச் சிகிச்சை உங்களுக்கு பாதுகாப்பாகவும் பொருத்தமாகவும் இருக்குமா என்பதை அறிய, சிறுநீரக பராமரிப்புக் குழு உங்கள் ஒட்டுமொத்த உடல்நிலையை மதிப்பிடும். உங்கள் இதயம் மற்றும் பிற உடல்நலப் பிரச்சினைகள், தொற்றுகள், தற்போது எடுத்துக்கொள்ளும் மருந்துகள் மற்றும் அறுவைச் சிகிச்சையைத் தாங்கக்கூடிய உடல்நிலை ஆகியவை கவனிக்கப்படும்.

மாற்று அறுவைச் சிகிச்சைக்குப் பிறகு மாற்றுச் சிறுநீரகத்தை உடல் நிராகரிக்காமல் தடுக்கும் மருந்துகளை நீண்டகாலம் எடுத்துக்கொள்ள வேண்டியிருப்பதையும் குழு உங்களுடன் கலந்துரையாடும். இறுதி முடிவு எடுப்பதற்கு முன் தேவையான பரிசோதனைகள் செய்யப்படும்.

சிறுநீரகம் தானம் செய்ய தாமாக முன்வரும் ஆரோக்கியமான வயது வந்த ஒருவர், தானமளிப்பதற்கு பொருத்தமானவரா என்பதை அறிய மதிப்பீடு செய்யப்படலாம்.

தானமளிப்பவரின் உடல்நலமும் விருப்பமும் பாதுகாக்கப்படுவதற்காக, அவருக்கு தனிப்பட்டும் இரகசியமாகவும் மதிப்பீடு செய்யப்படும். சிறுநீரகம் தானம் செய்வது அவருக்கும் சிறுநீரகம் பெறுபவருக்கும் பாதுகாப்பாகவும் பொருத்தமாகவும் இருக்குமா என்பதும் இந்த மதிப்பீட்டில் பார்க்கப்படும்.

மதிப்பீட்டிற்கு வருவது தானம் செய்வதாக முடிவு செய்துவிட்டீர்கள் என்று பொருளல்ல; மதிப்பீட்டின் முடிவில், சிறுநீரகம் தானம் செய்ய முடியாமலும் போகலாம்.

இல்லை.

• உங்கள் இரத்த வகை O என்றால்: O வகையிலிருந்து சிறுநீரகம் பெறலாம்.
• உங்கள் இரத்த வகை A என்றால்: A அல்லது O வகையிலிருந்து சிறுநீரகம் பெறலாம்.
• உங்கள் இரத்த வகை B என்றால்: B அல்லது O வகையிலிருந்து சிறுநீரகம் பெறலாம்.
• உங்கள் இரத்த வகை AB என்றால்: A, B, AB அல்லது O வகையிலிருந்து சிறுநீரகம் பெறலாம்.

எவ்வளவு காலம் காத்திருக்க வேண்டியிருக்கும் என்பதை முன்கூட்டியே துல்லியமாகக் கூற முடியாது. உங்கள் இரத்த வகை, பொருத்தமான சிறுநீரகம் கிடைப்பது, மருத்துவ ரீதியான பொருத்தம் மற்றும் சிறுநீரக ஒதுக்கீட்டு விதிமுறைகள் போன்ற பல காரணிகள் காத்திருக்கும் காலத்தைப் பாதிக்கலாம்.

நீங்கள் காத்திருக்கும் பட்டியலில் சேர்க்கப்பட்டால், அடுத்ததாக என்ன நடக்கும் மற்றும் சிறுநீரகம் கிடைக்கும் போது என்ன செய்ய வேண்டும் என்பதை சிறுநீரக மாற்று அறுவைச் சிகிச்சைக் குழு உங்களுக்கு விளக்கும்.

தானமாகப் பெறப்பட்ட சிறுநீரகம் பொதுவாக கீழ் வயிற்றுப் பகுதியில் வைக்கப்படும். உங்கள் சொந்த சிறுநீரகங்கள் வழக்கமாக அகற்றப்படமாட்டாது.

தொடர்ந்து தொற்று ஏற்படுதல், அதிக வலி அல்லது வேறு குறிப்பிட்ட மருத்துவ காரணம் இருந்தால் மட்டுமே உங்கள் சொந்த சிறுநீரகங்களில் ஒன்றையோ இரண்டையோ அகற்ற வேண்டியிருக்கலாம்.

ஆம். மாற்றுச் சிறுநீரகம் சீராகச் செயல்படுவதற்கு, அதை உடல் நிராகரிக்காமல் தடுக்கும் மருந்துகளை (நிராகரிப்பு எதிர்ப்பு மருந்துகள்) தினமும் எடுத்துக்கொள்ள வேண்டும்.

மருந்துகளின் அளவை தேவைக்கேற்ப மாற்றவும், பக்கவிளைவுகள் அல்லது தொற்றுகள் உள்ளனவா என்பதைக் கவனிக்கவும் தொடர்ந்து இரத்தப் பரிசோதனைகளும் மருத்துவச் சந்திப்புகளும் தேவைப்படும்.

மாற்றுச் சிறுநீரகத்தை உடல் ஏற்றுக்கொள்ளாமல், உடலின் நோய் எதிர்ப்பு அமைப்பு அதைத் தாக்கத் தொடங்குவதே நிராகரிப்பு. நிராகரிப்பு ஏற்பட்டாலும் பெரும்பாலும் அறிகுறிகள் இருக்காது. சிறுநீரகத்தின் செயல்பாடு குறைவதை இரத்தப் பரிசோதனையில் கண்டறிவதன் மூலம் நிராகரிப்பு சந்தேகிக்கப்படலாம்.

பல நிராகரிப்பு நிகழ்வுகளை மருந்துகள் மூலம் சிகிச்சையளிக்க முடியும். எனவே நிராகரிப்பு எதிர்ப்பு மருந்துகளை மருத்துவர் கூறியபடி தொடர்ந்து எடுத்துக்கொள்வதும், திட்டமிட்ட மருத்துவச் சந்திப்புகளுக்கும் பரிசோதனைகளுக்கும் செல்வதும் மிகவும் முக்கியம்.

மாற்றுச் சிறுநீரகம் பல ஆண்டுகள் நன்றாக செயல்படலாம். ஆனால் அது வாழ்நாள் முழுவதும் செயல்படும் என்று உறுதியாகக் கூற முடியாது.

நிராகரிப்பு எதிர்ப்பு மருந்துகளை மருத்துவர் கூறியபடி தொடர்ந்து எடுத்துக்கொள்வதும், திட்டமிட்ட மருத்துவச் சந்திப்புகளுக்கும் பரிசோதனைகளுக்கும் செல்வதும் மாற்றுச் சிறுநீரகத்தைப் பாதுகாக்கவும், ஏதேனும் பிரச்சினைகள் ஏற்பட்டால் அவற்றை ஆரம்பத்திலேயே கண்டறிந்து சிகிச்சையளிக்கவும் உதவும்.

CAPD-யில் டயாலிசிஸ் திரவ மாற்றங்கள் பகல் நேரத்தில் கையால் செய்யப்படுகின்றன. APD-யில் சைக்ளர் இயந்திரம் இரவு நேரத்தில், நீங்கள் தூங்கும்போது, திரவ மாற்றங்களைத் தானாகச் செய்கிறது. இரண்டிலும் வயிற்றில் பொருத்தப்பட்டுள்ள ஒரே வகையான கத்தீட்டர் பயன்படுத்தப்படுகிறது.

PD வீட்டிலேயே செய்யப்படுவதால், வேலை, படிப்பு, குடும்ப வாழ்க்கை மற்றும் பயணம் போன்ற அன்றாட நடவடிக்கைகளைத் திட்டமிடுவதில் அதிக சுதந்திரம் கிடைக்கலாம். சிலருக்கு தினசரி வாழ்க்கைக்கு ஏற்றவாறு டயாலிசிஸ் நேரத்தைத் திட்டமிடவும் முடியும்.

வீட்டில் PD செய்வதற்கு முன், அதை எவ்வாறு பாதுகாப்பாகச் செய்வது என்பதை உங்கள் சிறுநீரக பராமரிப்புக் குழு படிப்படியாகக் கற்றுக்கொடுக்கும். தேவையான இணைப்புகளைச் செய்வது, கத்தீட்டரைப் பாதுகாப்பாகப் பராமரிப்பது மற்றும் பிரச்சினைகள் ஏற்பட்டால் என்ன செய்வது என்பதையும் கற்றுக்கொள்வீர்கள். நீங்கள் வீட்டில் PD-ஐ பாதுகாப்பாகச் செய்யத் தயாராகும் வரை, உங்கள் சிறுநீரக பராமரிப்புக் குழு உங்களுக்குத் தேவையான பயிற்சியை வழங்கும். அதன் பின்னரே வீட்டில் செய்யத் தொடங்குவீர்கள்.

ஆம். உங்களுக்கு உதவி தேவைப்பட்டால், உங்கள் குடும்ப உறுப்பினர் அல்லது உங்களுக்கு உதவும் ஒருவருக்கும் PD செய்வது குறித்து பயிற்சி வழங்கப்படும். திரவ மாற்றத்தின் ஒவ்வொரு படியையும் பாதுகாப்பாகவும் சுத்தமான முறையிலும் செய்ய முடிகிறதா என்பதை PD குழு உறுதிப்படுத்தும்.

வயிற்றுப்படல டயாலிசிஸ் கத்தீட்டர் என்பது வயிற்றுச் சுவர் வழியாக வயிற்றறைக்குள் பொருத்தப்படும் மென்மையான குழாய். இந்தக் கத்தீட்டர் ஒரு சிறிய சத்திர சிகிச்சையின் மூலம் பொருத்தப்படும். கத்தீட்டரின் ஒரு சிறிய பகுதி உடலுக்கு வெளியே இருக்கும்; அதன்மூலம் டயாலிசிஸ் திரவம் உடலுக்குள் செலுத்தப்பட்டு பின்னர் வெளியேற்றப்படும்.

கத்தீட்டர் வெளியே வரும் பகுதியை எவ்வாறு சுத்தமாகவும் பாதுகாப்பாகவும் பராமரிப்பது என்பதை PD குழு கற்றுக்கொடுக்கும்.

பொதுவாக திரவ மாற்றத்தின் போது வலி இருக்காது. சிலருக்கு திரவம் உள்ளே செல்லும்போது அல்லது வெளியேறும் போது சிறிய அசௌகரியம் அல்லது வயிறு நிறைந்த உணர்வு ஏற்படலாம்.

புதிய அல்லது கடுமையான வயிற்றுவலி, வெளியேறும் திரவம் கலங்கலாக இருப்பது அல்லது காய்ச்சல் ஏற்பட்டால் உடனடியாக PD குழுவைத் தொடர்புகொள்ளுங்கள்.

இணைப்பு அல்லது கத்தீட்டர் வெளியேறும் இடம் வழியாக கிருமிகள் நுழைந்து பெரிட்டோனைட்டிஸ் என்ற தீவிரத் தொற்றை ஏற்படுத்தலாம். சரியான கை கழுவும் முறை, தூய்மையான இடம் மற்றும் கற்றுக்கொடுத்த இணைப்புப் படிகளைத் துல்லியமாகப் பின்பற்றுதல் இந்த அபாயத்தைக் குறைக்கும்.

CAPD செய்யும் போது நாளில் திட்டமிட்ட நேரங்களில் திரவ மாற்றங்கள் செய்ய வேண்டும். APD பொதுவாக இரவில் பல மணி நேரம் சைக்கிளர் இயந்திரம் மூலம் செய்யப்படுகிறது.

உங்கள் வேலை, படிப்பு, தூக்கம், பயணம் மற்றும் குடும்ப வாழ்க்கைக்கு ஏற்றவாறு PD அட்டவணையைத் திட்டமிட PD குழு உங்களுடன் கலந்துரையாடும்.

ஃபிஸ்டுலா என்பது பொதுவாக கையில் உள்ள ஒரு நாடியையும் நாளத்தையும் இணைத்து உருவாக்கப்படும் டயாலிசிஸ் வழியாகும். இது டயாலிசிஸிற்குப் பயன்படுத்தத் தயாராக சில காலம் தேவைப்படும். கத்தீட்டர் என்பது ஒரு பெரிய இரத்த நாளத்தில் பொருத்தப்படும் மென்மையான குழாய். இதை பொருத்திய பின்னர் டயாலிசிஸிற்கு உடனடியாகப் பயன்படுத்த முடியும்.

AV ஃபிஸ்டுலா உருவாக்கப்பட்ட பிறகு, டயாலிசிஸிற்குப் பயன்படுத்த ஏற்றதாக மாற சில வாரங்கள் தேவைப்படும். பொதுவாக 4–6 வாரங்களுக்குப் பிறகு, ஃபிஸ்டுலா டயாலிசிஸிற்குப் பயன்படுத்துவதற்குப் போதுமான அளவு முதிர்ச்சியடைந்துள்ளதா என்பதை சிறுநீரக பராமரிப்புக் குழு பரிசோதிக்கும். சில ஃபிஸ்டுலாக்கள் டயாலிசிஸிற்குப் பயன்படுத்தத் தயாராக அதிக காலம் எடுக்கலாம். தேவையானால், ஃபிஸ்டுலாவை டயாலிசிஸிற்குப் பயன்படுத்த ஏற்றதாக மாற்ற மற்றொரு சத்திர சிகிச்சை தேவைப்படலாம்.

AV ஃபிஸ்டுலா பயன்படுத்தப்பட்டால், ஒவ்வொரு டயாலிசிஸ் அமர்விலும் இரண்டு ஊசிகள் பயன்படுத்தப்படும். கத்தீட்டர் பயன்படுத்தப்பட்டால், டயாலிசிஸ் இயந்திரம் கத்தீட்டருடன் நேரடியாக இணைக்கப்படுவதால் ஊசிகள் பயன்படுத்தப்படாது.

இரத்த டயாலிசிஸ் பொதுவாக வாரத்தில் குறிப்பிட்ட நாட்களில் செய்யப்படும், மேலும் ஒவ்வொரு அமர்வும் பல மணி நேரம் நீடிக்கும். உங்களுக்கு வாரத்தில் எத்தனை முறை டயாலிசிஸ் தேவை, ஒவ்வொரு அமர்வும் எவ்வளவு நேரம் நீடிக்க வேண்டும் என்பதை உங்கள் உடல்நிலை மற்றும் மருத்துவத் தேவைகளின் அடிப்படையில் சிறுநீரக பராமரிப்புக் குழு தீர்மானிக்கும்.

இரத்தம் மென்மையான குழாய்கள் வழியாக டயாலிசிஸ் இயந்திரத்திற்குச் சென்று, டயலைசர் வழியாகச் செல்லும்போது கழிவுகளும் தேவைக்கு அதிகமான நீரும் அகற்றப்படும். சுத்திகரிக்கப்பட்ட இரத்தம் மீண்டும் உங்கள் உடலுக்குத் திரும்பும். டயாலிசிஸ் நடைபெறும் முழு நேரத்திலும் உங்கள் இரத்த அழுத்தம் மற்றும் உடல்நிலையை பணியாளர்கள் தொடர்ந்து கண்காணிப்பார்கள்.

பலர் டயாலிசிஸ் அமர்வு முடிந்த பிறகு நன்றாக உணர்வார்கள். சிலருக்கு சோர்வு, தலைச்சுற்றல், குளிர் உணர்வு அல்லது தசைப்பிடிப்பு ஏற்படலாம். இவ்வாறான அறிகுறிகள் ஏற்பட்டால் சிறுநீரக பராமரிப்புக் குழுவிடம் தெரிவிக்கவும். காரணத்தைப் பொறுத்து அடுத்த டயாலிசிஸ் அமர்வில் தேவையான மாற்றங்கள் செய்யப்படும்.

உங்கள் சிறுநீரக பராமரிப்புக் குழு கூறும் பராமரிப்பு வழிமுறைகளைப் பின்பற்றுங்கள். கத்தீட்டர் உள்ள இடத்தை சுத்தமாகவும் உலர்ந்தும் வைத்திருங்கள். AV ஃபிஸ்டுலாவின் அதிர்வை தினமும் உணர்ந்து பாருங்கள். ஃபிஸ்டுலா உள்ள கையில் இரத்த அழுத்தம் அளப்பதையோ, இரத்தம் எடுப்பதையோ, இறுக்கமான ஆடை அல்லது பொருட்களை அணிவதையோ தவிர்க்கவும். சிவப்பு, வீக்கம், வலி, இரத்தப்போக்கு, காய்ச்சல் அல்லது ஃபிஸ்டுலாவின் அதிர்வு குறைவது போன்ற மாற்றங்கள் ஏற்பட்டால் உடனடியாக உங்கள் சிறுநீரக பராமரிப்புக் குழுவைத் தொடர்புகொள்ளுங்கள்.

இல்லை. டயாலிசிஸ் அல்லது சிறுநீரக மாற்று அறுவைச் சிகிச்சை செய்யப்படாவிட்டாலும், தேவையான மருத்துவ பராமரிப்பு தொடர்ந்து வழங்கப்படும். மருந்துகள், மருத்துவச் சந்திப்புகள், இரத்தப் பரிசோதனைகள், உணவு மற்றும் ஊட்டச்சத்து ஆலோசனை, அறிகுறிகளைக் கட்டுப்படுத்தும் சிகிச்சை மற்றும் குடும்பத்திற்கான ஆதரவு ஆகியவை உங்கள் தேவைக்கேற்ப தொடரும்.

ஆம். உங்கள் சிறுநீரக செயல்பாடு மேலும் குறைந்தாலும், மருத்துவ பராமரிப்பு தொடர்ந்து வழங்கப்படும். அறிகுறிகளைக் கட்டுப்படுத்தவும், தேவைக்கேற்ப மருந்துகள், உணவு மற்றும் குடிக்கும் திரவத்தின் அளவு தொடர்பான ஆலோசனைகளில் மாற்றங்கள் செய்யவும் சிறுநீரக பராமரிப்புக் குழு உதவும். உங்கள் உடல்நிலையில் மாற்றம் ஏற்பட்டால் யாரைத் தொடர்புகொள்ள வேண்டும் என்பதையும் குழு விளக்கும்.

சோர்வு, அரிப்பு, குமட்டல், பசியின்மை, வீக்கம், வலி, தூக்கப் பிரச்சினைகள் மற்றும் மூச்சுத்திணறல் போன்ற அறிகுறிகளைக் குறைக்க அல்லது கட்டுப்படுத்த சிறுநீரக பராமரிப்புக் குழு உதவும். உங்களுக்கு ஏற்படும் அறிகுறிகளுக்கு ஏற்ப தேவையான சிகிச்சையும் ஆதரவும் வழங்கப்படும்.

டயாலிசிஸ் அல்லது சிறுநீரக மாற்று அறுவைச் சிகிச்சையால் கிடைக்கக்கூடிய பயன் குறைவாக இருக்கலாம் என எதிர்பார்க்கப்பட்டாலோ, அந்தச் சிகிச்சைகள் உங்கள் உடல்நிலைக்கு அதிக சுமையாக இருக்கக்கூடியதாலோ, அல்லது அவை உங்கள் விருப்பங்களுக்கும் சிகிச்சை இலக்குகளுக்கும் பொருந்தாவிட்டாலோ, டயாலிசிஸ் இல்லாத சிறுநீரக பராமரிப்பை பரிசீலிக்கலாம். இது உங்களுக்கு பொருத்தமானதா என்பதை உங்கள் சிறுநீரக பராமரிப்புக் குழுவுடன் கலந்துரையாடி முடிவு செய்யலாம்.

ஆம். உங்கள் உடல்நிலைக்கும் பராமரிப்புத் திட்டத்திற்கும் ஏற்ப மருத்துவச் சந்திப்புகளும் இரத்தப் பரிசோதனைகளும் தொடர்ந்து செய்யப்படும். அறிகுறிகள், மருந்துகள், இரத்தப் பரிசோதனை முடிவுகள், ஊட்டச்சத்து, அன்றாட செயல்பாடு மற்றும் தேவையான ஆதரவு ஆகியவற்றை சிறுநீரக பராமரிப்புக் குழு தொடர்ந்து மதிப்பிடும்.

அறிகுறிகளைக் குறைக்கவும், உங்களுக்கும் உங்கள் குடும்பத்தினருக்கும் தேவையான நடைமுறை உதவிகளை வழங்கவும், மனதளவில் துணையாக இருக்கவும் நோய்த்தணிப்புப் பராமரிப்பு (palliative care) குழு சிறுநீரக பராமரிப்புக் குழுவுடன் இணைந்து உதவும். இந்தக் குழுவின் உதவியைப் பெறுவது சிறுநீரக பராமரிப்பு நிறுத்தப்படுகிறது என்று பொருளல்ல. நோய்த்தணிப்புப் பராமரிப்பு வாழ்க்கையின் இறுதிக் கட்டத்திற்கு மட்டும் வழங்கப்படுவதும் அல்ல.

ஆம். உங்கள் சிறுநீரக செயல்பாடு, அறிகுறிகள், ஒட்டுமொத்த உடல்நிலை மற்றும் பிற உடல்நலப் பிரச்சினைகளைப் பார்த்து, எதிர்காலத்தில் உங்கள் உடல்நிலை எவ்வாறு மாறலாம் என்பதை சிறுநீரக பராமரிப்புக் குழு விளக்கும். ஆனால் இது எப்போது அல்லது எவ்வளவு விரைவாக நடக்கும் என்பதைத் துல்லியமாகக் கூறுவது எப்போதும் சாத்தியமில்லை. நீங்கள் விரும்பும் அளவு தகவலைக் கேட்டு, சிந்திக்க நேரம் எடுத்துக்கொண்டு, பின்னர் மேலும் கேள்விகளைக் கேட்கலாம்.

ஆம். உங்கள் உடல்நிலை, தேவைகள் அல்லது விருப்பங்கள் மாறினால், உங்கள் பராமரிப்புத் திட்டத்தையும் மீண்டும் பரிசீலித்து மாற்றலாம். சில சிகிச்சை முறைகளைத் தொடங்குவதற்கு முன், தேவையான மதிப்பீடுகளும் ஏற்பாடுகளும் செய்ய வேண்டியிருப்பதால், அவற்றைத் தொடங்க சிறிது காலம் தேவைப்படலாம்.

உங்கள் விருப்பத்திற்கேற்ப, உங்கள் குடும்பத்தினரும் பராமரிப்பில் பங்கேற்கலாம். உங்கள் பராமரிப்புத் திட்டத்தைப் புரிந்துகொள்ளவும், மருந்துகள் மற்றும் மருத்துவச் சந்திப்புகளை நினைவில் வைத்துக்கொள்ளவும், உடல்நிலையில் அல்லது அறிகுறிகளில் ஏற்படும் மாற்றங்களைக் கவனிக்கவும், தேவையான நடைமுறை உதவிகளை வழங்கவும், மனதளவில் துணையாக இருக்கவும் உங்கள் குடும்பத்தினர் உதவலாம்.